Violence

 BIM



I was born and raised out dey in St James 

And dat is where i intend to stake my claims

i remember de growing up days spent pon de beach

like deyso in prospect - man life was a peach

life was sweet a fuh lil man back in dem good ole days

dint have to worry bout nutting xcept yuh nex plays



But along cum dem nasty gud fuh nutting drugs

and it seems like everybody fuhget bout luving hugs

its like we want to fight de gunfyah wid gunfyah

and yuh really feel dat dat is de true ansah

yuh here talking bout bringing in de vigilante

i honestly feek dat yuh mebbe watching too much tv



coz yuh know wha gine happen nex - is pure anarchy

de men wid de biggest guns gine rule we country

coz de moment dat sumbody step out of line

dem gine get shoot-up fuh a make believe crime

I doan know eff yuh did ever read Animal Farm

but tek note of dat story b4 you really harm

dis island we both love with all our heart

but BJ i am sure dat we can both play a part



I aint got de answers - i know we hafta educate dem

but yuh gots to look fuh de root of de problem 

what mek den want go round killing people so

is it becaisue it is de only life dem know?

perhaps its because dem want to break free 

agen perhaps dem is de ones who watch too much tv

sell a few drugs mek munny real real quickly

den kill anybody who wanta tek over yuh territory



but are dey doing dat to put food pon de table

or are dey doing it coz dem beleive all dem fables

bout crime pays as long as yuh doan get arrested

we gotsa change dese views wid positive messages

like yuh can succeed widout all de gun violence

get sum role models who have made difference



improve the quality of life within the 'ghettos'

make them areas where life can survive widout blows

mek sure dat unemployed youth got sumting to do

so dey doan hang round de place like dem in a zoo

bring in national service maybe thats a possibility

get dem cleaning de hopsital to instil sum humility

wat about - a youth training scheme that guarantees a career

not wuk fuh sh!te munny den go long down de road somewhere 



we culd ban all guns wid threats of long sentences too

so dat eff yuh got a gun to Glendairy yuh gine in de do

i doan beleive de hype boy yuh need a gun to protect

protect wha? a gun is to kill a body dat yuh suspect

gine hurt yuh in sum way - so yuh alwways gine be rite

when yuh pull out ya piece and waste - a 6 yr ol boy - OH SH!TE

better you dan me is all i gonna say - coz yuh gotta undertsan

dat is yuh choice to maim and destroy wid dat weapon



I realise dat i rambling on about dis issue

but babajeff let me reiterate i do agree wid you

dis crime ting is a big big ting dat wont go away

but we have to fight it togedder in a contructive way

i know yuh probly tink dat i is a weak pacifist and ting

but den peepul said de same to Dr Marin Luther King

I aint saying dat i am anywhere near as great 

but what he stood for is what i would like to emulate.



I love bim - and i want it to be free

free fom all of the abject poverty

free from the killings - the murders

free from the runnings of de dealers

and most of all i want bim to be free

so we can live togedder in perfect harmony


Mad Q

Poetry Index.